StadsWeb

Stad meer dan droag brôôd

Content

StadsWeb
Ik ha de vorege keer gezeit dat ik wat meer zou vertelle hoe mun zustur noe weunt. Noe daer is even niks van gekomme, ik bin un tietje in de lappemande geweest. Mar ik bin noe weer wat opgeknapt dus bin ik weer mar us in de pen geklomme
opmaak
Op bezoek bie mun zustur 2

Ik ha de vorege keer gezeit dat ik wat meer zou vertelle hoe mun zustur noe weunt. Noe daer is even niks van gekomme, ik bin un tietje in de lappemande geweest. Mar ik bin noe weer wat opgeknapt dus bin ik weer mar us in de pen geklomme.

As je noe ziek bint dan zit tur niks arus op dan op je bed te bleuven. Vroegur was ut soms welus un pretje om ziek te wezun. Je moedur maekte dan us steetje in de kaemur. Ze nam twee zurgstoelun, die zette ze tegunovur mekaare, daerop gieng de wasplanke in un metras mit un dekun in un kossen. In as je gelok had mocht je voor de raem laage in haelde ze diengun die je nodug had. Bie dun doktur haelde ze hoestdrank, dat was mar un vies goedje, mar jae je most ut inneme. Wat aak niet lekkur was, levertraen elleku avoend kreeg je un eetlepul van dat spul mit un sukurkloentje voor de smaek.

Jae vroegur most je soms gekke diengun doen om gezoend te bleuvun of te worren.
As je oorpienne had deje ze daer un paer droppeltjus lauwe maalk of slaeolie in. Bie kiespienne deje spoele mit konjak. Mar noe weer evun terug naer mun zustur

Ze heit aak un prachtege kaemur mit dearin un groot bankstel, un grote eethoek un platte televisie, un sterio in nog meer van dat gedoe. Bie oens stieng dur vroegur in de kaemur twee zurgstoelun, een an elleke kante van de raaktaeful. Naest de stoel van mun vadur stieng de raakstandaard, de krantebak, in un staende leeslamp. Dan hadde we nog un dresswar in un taeful mit vier stoelun, noe dat was allus wat tur in de kaemur stieng. An teafel deje we ete in nae hut etun un spelletje totdat we naer bed moste.

Ik mot tur mar weer un einde an maeke, mit voor allemaele un gezoend in gelokkug nieuw jaer. Allemaele mar weer de groete van Jan van 't Hoekie