Oenze slaepkamurtjus
De slaepkamer noe is van alle gemakken voorzien, vroegur was dat arus Kleine huusjes, kleine zoldurs mit un schuun dek in geen raemun, dus weinig ruumte. Grote gezinnen mit veul kindurs in die moste alemaele un plekkie ha om te slaepun.
Wielle sliepe mit zun vierun op de zoldur. Mun vadur in moedur sliepe beneeje in de bestee. Om bovun te kommen most je een steile smalle houtun trap op, die trap stoend in de gange. Mun vadur had op zoldur un paer kamertjus getummert. Volgus mien waare die kamertjus van wat houte paelen waer hardboord of stevig karton tegen an getummert was, in dat was weer behange mit van dat streepies behang. Dur zat geen plefon in je kon zo tegun het pannedek an kiekke. Op de planke vloere lag un stik zeil.
Verdur stoend dur un tweepersoons ledekant mit van die iezere buizen waer un spiraal an vast zat, un ingels ledekant noeme ze dat, daerop sliepe mun broer in ik, mun zussen sliepe in hut are kaemertie. Dur stoend un nachtkassie naest, in meer ruumte was ter niet. Dat nachtkassie was geweun un sinasappelkistte op zun kante die was behange mit dat zellefde strepies behang in daer hieng mit zoon veertie in twee aagies un gerdientje voor. Die sinasappelkistte kon je voor niks kriege bie Teun Mulder de groenteboer,.je most dan wel klant weeze.
Op hut nachtkassie stoend un wekkur, in achtur het gerdientje stoend de pispot. Dat was bittere noodzaek, wielle hadde geen wc in huus zoas teguwoordig, de plee stoend buuten, dus as je snags most hoefde je niet naer buuten, mar kon je de pispot gebruike. Je kon zo gezeit de pot op. Voor oens bed lag nog wel un kleedje, dat was lekkur voor de kouwe voetun. Je mot aak niet dienke dat wielle verwareming bovun hadde. We hadde wel un haap dekuns op oens laage. Ik gelave van vier wolle deekuns in un gestikten deekun.
Nee as hut swinturs buuten vroor dan vroor hut boven op zoldur net zo hard. Kweet nog wel dak sogguns un keer wakkur wier in dat tur wel drie centimetur stuifsneeuw op mun bed lag, dat waaide geweun tussun de pannen deur near binnen, noe dan bin je sogguns geliek wakkur oor.
Allemeale de groete van Jan van ât hoekie.