StadsWeb

Stad meer dan droag brôôd

Content

StadsWeb
Sinterklaasaevend was bie oens een groot feest, we keeke dur naer uut. We konde niet wachte tot het gezellege aeventje zou komme, in wat zoude we allemaele kriege.
opmaak
Sinterklaas kepoentje, gooi wat in mun schoentje?.

Sinterklaasaevend was bie oens een groot feest, we keeke dur we kun naer uut. We konde niet wachte tot het gezellege aeventje zou komme, in wat zoude we kriege. Op de radio konde we luustere dat tie mit de stoomboot was angekomme, dus noe mar ofwachte.

Tis mien opgevalle dat de Sint van tegunwoordig guller is dan de Sint van vroegur. Wielle zette elleke avend onze schoen, we zoenge wel een stik of zeven Sinterklaasversies bie de schouwe. Soms wel meer versies want zolang we zoenge hoefden we niet naer bed. We deeje aak nog un paerdepee in wat strooij in oenze schoen. In as we de andere ochtend in oenze schoen keeke zat tur soms un klein suikerbeesie in, dus veul zienge hielup aak niet veul.

Op sinterklaasaevend zatte we allemaele, mun twee zussun, mun broer in moedur, roend de taefel op de diengen die zouwe komme. Vadur most nog un boodschap doen had moedur gezeit. We droeke seklademelk in de radio stoend an. Opeens wordt dur op de deure geboensd, de deure gieng un aantje ope, un zwarte hand gooide wat peperneuten in de kaemer, dus wielle dur op of, die kreeg je niet elleke dag, dus dat was smulle.

Nae un paer menuten komt vadur binne. kiek us wat tur in de gange stoend, un mande mit kedootjes, die heit sinterklaas gebrocht dienk ik. Dat ken kloppe zeide wielle want dernet wier dur op de deure geboensd in dur wierre peperneuten naer binnen gegooid.

Dur ware voor allemaele drie kedootjes, die mochte we ombeurte uutpakke. Bie elk kedootje zat un reimpie, in dat klopte nog aak, hoe zou Sinterklaas dat noe wete docht ik bie mun eige. Ik kreeg un sekladelettur, de J van Jan, un beest van suikergoed in un houte melkautootje mit melkbussen dur op, noe ik kon mun gelok niet op. As je kiekt wat de jeugd noe allemaele kriegt vraeg ik me wel us of binne ze daer nog blieje mee

Allemeale mar weer de groete van Jan van ’t hoekie