Op oens Paesbest
Tis bienae weer paesen. Jae dan veranderde der nog al wat vroegur. De kachel gieng uut, die wier schoongemaekt in gepoest, hut puppie uut de schouwe in het rooije pepier dur voor dus geen waarmte meer op un kouwen aevond. We gienge in het nieuw in dur was iets extra's mit het eten.
Je gieng mit paesen aak in hut nieuw, de kinderbieslag was binnen dus hut kon leije. Noe is dat niet helemaele waer, mar iedereen gieng in het nieuw dus je most wel. Wielle gienge dan un daagie naer Rotterdam, eerst mit de bus naer meneersehood, dan mit de boot naer Hellevoet, in dan mit hut tremmetje naer de Rosestraet. Dan gieng het beginne, wienkel in in wienkel uut, we bezochte ze allemaele C&A, Vroom & Dreesman, de HEMA, Termeulen in de Bijenkorf mar die was meestal te dier.
Gepakt in gezakt gienge we weer terug naer de Rosestraat, as we op tied waare konde we bie Jan Mulder nog voor un paer centen un borretje petat eete, voordat we de lange reis terug naer Stad gienge maeke.
Mit paese wiere we dan op zun peasbest opgetuugd, helemaele in het nieuw naer de kaareke.
Dat feest was wan korte duur want as we uut de kaareke kwamme most oens ouwe kloffie weer an, we moste mit die kleren de hele zeumer doen.
We keeke aak uut naer het paesontbijt, we krege dan naest de geweune boterhammen un sneetje krentebrood. In bie het avendeten kreege we dan twee, jae je leest het goed, twee gekleurde eieren van oenze eigen kippen Dat kleursel zat aak binnen in het ei, mar dat mocht de pret niet drukke, twee eiers kreege we arres nooit.
Allemaele Prettege Paesdaegen en de groete van Jan van 't hoekie