StadsWeb

Stad meer dan droag brôôd

Content

StadsWeb
Hut EK voetbal staet weer voor de deur, de gekte in oens landje breekt weer los. Hele straeten binne versierd, op Stad is ter nog niks tezien van die gekte, kiek dat komt omdat Stadtenaeren nugtere maasun binne.
opmaak
Hut EK voetbal

Hut EK voetbal staet weer voor de deur, de gekte in oens landje breekt weer los. Hele straeten binne versierd, op Stad is ter nog niks tezien van die gekte, kiek dat komt omdat Stadtenaeren nugtere maasun binne.
Vroegur blies oenze VVS aak zun woordje mee op Flakkee.

In 1946 wier de VVS weer her opgericht in in dat eerst seizoen wiere we al kampioen van flakkee. We gienge dan mit de uut wedstrijen mit un vrachtwaegun van Trommel.
Over de bak was un zeil gespanne, in dur stoende veilingkissies om op te zitte. Je hobbelde oendur weg van de ene naer de are kante van de auto deurdat de verieng niet al te best was, in de wegen waare aak niet wat ze noe binne. Zoon ritje heen in terug mit de vrachtwaegun naer Nieuwe Tonge koste 7 nederlandse zulvere guldens.

Wielle hadde toen aan un koolketter, Bram Wagner kon zo hard schiette dat menege keeper de bal niet zag gaen mar alleen mar hoorde fluite, in hareken schoot tie de bal zelfs dwars deur hut net heen.

Je had toen aak un flakkees elftal, daerin voetbalde de beste speulers van Flakkee. Jaas Mellaard, Aren de Gans in Aai Arensman wiere daer regulmatig voor gevraegd.

VVS voetbalde toen in de baagerdreef, daer waer noe Malieflouwer zit. Daer stieng toen un houte keet as kleedkaemer. Wasse kon je je eige daer niet dat most je thuus mar doen.

In 1947 most de naem van VVS verandert worre, omdat tur al un club was in de RVB mit die naem, dus toen wier hut SNS. Deur de jaeren heen is SNS menig keertje kampioen geworre, mar aak menig keertje gedegradeerd, hut Volendam van Flakkee.

Noe mar ofwachte wat hut Nederlans elftal gaet prestere, half Nederland dienkt weeral dat ze kampioen binne, nog voordat ze een wedstrijd gespeuld ha. As nugtere Stadtenaer dienk ik dan ze nae de eerst roende naer huus kenne, we zalle kiekke?

Allemeale mar weer de groete van Jan van 't hoekie