StadsWeb

Stad meer dan droag brôôd

Content

StadsWeb
Hallo Allemaele, noe hak hoore zaage dat je van Stad naer Tiengemete kan vaere, noe dat doet me weer dienke an vroegur. Wielle gienge in de wintur aak naer Tiengemete, niet mit de boat mar laape over 't ies.
opmaak
Van Stad naer Tiengemete

Hallo Allemaele, noe hak hoore zaage dat je van Stad naer Tiengemete kan vaere, noe dat doet me weer dienke an vroegur. Wielle gienge in de wintur aak naer Tiengemete, niet mit de boat mar laape over 't ies.

Vroegur was hut Haeringvliet nog ope waetur, dus had je nog eb in vloed. Je had toen aak nog strienge winturs, soms vroor hut dat hut kraakte. Dur kwam dan un lage ies op hut Haeringvliet. In as hut dan dik genog was kon je laapend naer Tiengemete. Dat was meestal un vezetje op de zoendagmiddag. Hut was soms harstikke druk op hut ies.

Dur lagge tonnen in hut waetur, van die rooje in groene om de schepen in goeje baenen le leijen. As tur ies lag gieng ja aak naer die tonnen toe om daer je naem op te schrieven, das leuk voor hut naegeslacht. Wat wielle niet wiste was dat die tonnen om de zoveul tiet uit hut waetur gehael wierre om te worden opgeknapt, ze wiere dan aak weer gevaarfd, dus as je enkele jaerun laetur weer gieng kiekke kon je die naemen niet meer vinde.

Dur is nog un jaer geweest dat hut zo hard gevroore had dat je aan mit de auto ovur hut waetur naer Tiengemeete kon rieje. Dur binne nog wel maasun die daer foto's van ha dienk ik.

Op Tiengemete gieng je dan roend kiekke, hut was tur altiet rustug, dur waare brommers geen auto's of zo. Ik dienk dat hut nog steeds de moeite waerd is om daer us te gaen kieke. Ik ha begrepe dat hut bootje dur nog enkele weekun naer toe vaert, dus ik zou zaage griep die kans mit twee handun an noe hut nog ken.

Allemeale mar weer de groete van Jan van 't hoekie