StadsWeb

Stad meer dan droag brôôd

Content

StadsWeb
Kwas un paer daegen bie mun zuster op veziete. Ze is un tieje geleje verhuusd naer un aar huus. Un senioreweunien hiet dat noe, vroegur zeije ze un bejaerdeweunieng mar dat mag je niet meer zaage. Ze heit noe allus geliekvloers zak mar zaage.
opmaak
Op bezoek bie mun zustur

Kwas un paer daegen bie mun zuster op veziete. Ze is un tieje geleje verhuusd naer un aar huus. Un senioreweunien hiet dat noe, vroegur zeije ze un bejaerdeweunieng mar dat mag je niet meer zaage. Ze heit noe allus geliekvloers zak mar zaage.

Jae as je daer naer kiekt buuten vroegur, dan is ut van alle gemakkun voorzien in tis aak wat waerd dat je geen trappun meer hoeft te klimmun. Vroegur moste we un steil houte trappie op naer de zoldur waer we mit me kaare sliepe. Niks geen kaemertjes mar un ope zoldur je keek zo tegun de dekpannen an. Hut was tur koud in de wintur in as hut in de wintus sneeuwde dan lag tur aak sneeuw op je bed.

Ze heit un mooije keukun mit un ingebouwd gastel de luchies worre mit un ofzuugkap weggezoge. Moedur dee vroegur kooke op un paer peteroliestellen in de lusse in dan stoenk hut hele huus naer datgene je ant kookun was in near peterolie.

Ze heit dur aak centrale verwaremieng, druk op de knop int wordt overal waarm. Dat is arus dan vroegur toen moste we elleke dag de kachgul an maeke mit un krante in kachelhoutjes, in as die dan goed brande konde de kolun dur op, dan duurde nog un tiedje voordat hut in de kaemur waarm was.

Un prachtege douche wear je aak geliek waarm waetur heit, das wat arus dan dat je op vriedagavoend om de beurte in de keuken in de teile mocht. Moedur dee dan un ketel waarm waetur kooke op hut gastel in daer most je hut mee doen. As dun lesten in de teile gieng kreeg die dur nog un beentje waarm waetur bie ut de ketel.

Zo heit ze nog meer diengen die heel arus binne dan vroegur, mar daer zalk de volgende keer wat ovur vertelle.

Allemaele mar weer de groete van Jan van 't Hoekie