StadsWeb

Stad meer dan droag brôôd

Content

StadsWeb
Waer bleuft de wintur? Blueft sneeuwballe gooije, schaasen rieje in sleeje rieje iets wat vroegur leuk was, of zouwe de echte winturs mit un pak sneeuw van zoon dertig centimetur nog terug komme.
opmaak
Sneeuw pret

Waer bleuft de wintur? Blueft sneeuwballe gooije, schaasen rieje in sleeje rieje iets wat vroegur leuk was, of zouwe de echte winturs mit un pak sneeuw van zoon dertig centimetur nog terug komme.

As kind wezende keek je uut naer sneeuw, in as hut der dan lag gien je mit zun allen, jong in oud, de straet op om sneeuwballen te gooijen. Dur ware op hut durp hele sneeuwbal gooi gevechten, in de voorbie kommende meiden wiere lekker ingepeperd mit verse sneeuw. We haelde aak wel us kattekwaed uut, as bie maasur de voordeure ope stieng probeerde we un sneeuwbal in de gange te gooien. Dur wier op hut durp niet zo gauw gestraaid mit pekel, dat most deur Hen van Pelt mit de hand gebeure, dus je kon je uutleve. De ouwere maasun deje dan wel drek de stoepe schoonvege, mar die sneeuw veegde ze op straet zodat je die haapen aak kon gebrueke.

Achtur op den bleik deje we as hut paksneeuw was un sneeuwpoppe maeke. We deje drie ballen rolle, twee grote voor zun lief in un kleine voor zun kop, die zetten we op mekaare. Mit kolen deje we de knapen van de jas maeke, zun agun ware aak twee eijerkolen, zun neus in zun moend un paerdepee. We deje de sneeuwpop un muste op in stakke du run bezum in, net echt toch?.

Sleetje rieje was aak leuk, we gienge dan mit de stekkerslee van de Kaaje of van de Voorstraete of. Ik had un houte slee mit twee stekkers, die stekkers waare twee roende stokken van un bezemsteel mit oenderin un spieker, dan kon je as je op de slee zat je eige ofzette in zo naer beneje glieje. Je most wel uutkieke mit die stekkers, je kom mekaare dur leeluk mee bezere. As je van de Kaaje of gieng most je wel uutkieke dat je op tiet stil stoend andurs lag je in de kaaje. Waer is dien tiet in de sneeuw gebleve?

Allemeale mar weer de groete van Jan van ’t hoekie