Peejes zaaie mit opa
Veul maasen hadde een stikkie groend waer ze groente op verbouwden. Die groend huurde ze van de kaareke. Noe binne der nog wel stikkies groend die ja kan huure mar de animo is stikken minder hak hoore zaage, in toch is hut harstikke leuk om te doen.
Ik gieng op un aevond mee mit mun opa naer t'hof, dat lag in de vroone. Dur most nogal wat gereedschap mee, un kweekhaek, un schrepel, de plakklompen in un schop. In de vroone was hut un drukte van jewelste iedereen was bezig mit zaaien in zo.
Mun opa maekte eerst un beddetje in toen maekte die de groend goed los mit de kweekhaak, elk kleutje most ter an gelave. Toen de groend geliek in fien gemaekt was dee die un touwtje spanne tussen twee stokkies. Langs dat touwtje dee die un geultie maeke mit de schrepel. In zo dee die op dat beddetje veuf geulties maeke. Toen dee die dur wat poejer in straaije, das tegen de wurmpies in de peejes zei die.
Nou toen most tur gezaaid worre das wel un precies waarekje, dat zaad van die peejes is heel fien in dat straai je gauw te dik. Noe daer was tie un behoorleke tiet an bezig, mar uiteindeluk was dat aak gebeurt. De gemaekte geulties dichtmaeke mit de kweekhaek was hut volgende klussie. In as klap op de vuurpijl wier allus vast geplakt mit de plakklompen. In noe mar wachte tot ze goed binne om te eten.
Allemeale mar weer de groete van Jan van 't hoekie